Milleiros de persoas van ata Samil para seren testemuñas dun desfile inédito
As motivacións foron moi diversas, pero a maioría coincidiu na mágoa de non poder gozar da exhibición aérea
Milleiros de persoas desprazáronse ata a contorna da praia de Samil para seguir de preto o desfile do Día das Forzas Armadas, que por primeira vez se celebrou na cidade de Vigo.
Moita xente acudiu á zona horas antes para garantir un sitio na primeira fila. O goteo comezou sobre as oito da mañá ao longo de todo o quilómetro e medio de percorrido.
En autobús ou a pé, foron chegando para seren testemuñas dun día inédito. As motivacións da súa presenza neste acto resultaron diversas. Falaron de orgullo, agradecemento, curiosidade...
No que coincidiu a maioría, iso si, foi na mágoa de non poder gozar da exhibición aérea. Por mor das nubes, quedaron coa morriña de mirar cara ao ceo.
