Sanidade alerta da detección de test falsos de covid e gripe no mercado europeo

A Axencia Española de Medicamentos e Produtos Sanitarios alertou da detección no mercado europeo de unidades falsificadas dun test de autodiagnóstico de covid-19 e gripe, aínda que polo momento descoñécese se a proba falsificada foi distribuída en España.

Trátase do test de autodiagnóstico COVID-19 and Influenza A+B Antigen Combo Rapid Test, fabricado por Safecare Biotech (Hangzhou) Co., Ltd., con referencia FCO-6032 e número de lote FCO24090516.

Foron as autoridades portuguesas as que avisaron da súa comercialización no mercado europeo, informou a axencia dependente do Ministerio de Sanidade.

O propio fabricante confirmou que o produto foi manipulado e que o número de lote FCO24090516 é falso. A Axencia Española de Medicamenos e Produtos Sanitarios iniciou unha investigación para coñecer a distribución dos produtos afectados e a situación en España.

Con todo, a axencia informou de que existen no mercado unidades conformes do produto para autodiagnóstico COVID-19 and Influenza A+B Antigen Combo Rapid Test do mesmo fabricante e con referencia FCO-6032, polo que remarca que esta alerta afecta unicamente o produto falsificado.

Os produtos falsificados, segundo detalla a AEMPS, poden identificarse porque se adheriu unha etiqueta coa información modificada relativa ao número de lote (FCO24090516), a data de fabricación (09/2024) e a data de caducidade (09/2026).

Ademais, nos test falsos eliminouse o número de lote e a data de caducidade do casete de proba incluído no kit, de maneira que só aparecen os símbolos; eliminouse a data de caducidade do tubo coa solución extractora e o hisopo incluído no kit non é o mesmo que utiliza o fabricante do produto orixinal (Dalian Rongbang Medical Healthy Devices Co. Ltd. con representante autorizado Lotus NL, B.V. (Holanda).

Envase exterior do produto falsificado. (AEMPS)