A OMS di que a covid causou 22,1 millóns de mortes, o triplo do notificado
Ata o de agora falábase de 7 millóns de decesos notificados
Por cada falecemento polo coronavirus houbo ao redor de dúas mortes adicionais relacionadas con ela, segundo a Organización Mundial da Saúde
As mortes a nivel mundial a causa da covid-19 estímanse en 22,1 millóns, fronte aos 7 millóns de mortes notificadas ata o de agora, segundo o informe sobre estatísticas sanitarias globais 2026 presentado este mércores pola Organización Mundial da Saúde (OMS).
A cifra é o triplo das notificadas ata o de agora e tradúcese en que por cada morte pola covid-19 rexistrada houbo ao redor de dúas mortes adicionais relacionadas con ela.
As cifras recoñecidas pola OMS a partir de estimacións facían mención ata o momento a uns 15 millóns de decesos, tanto por causas directas como indirectas.
Segundo os expertos, este achado pon de relevo tanto a subnotificación que houbo das mortes provocadas directamente polo virus, como o volume das mortes indirectas polas interrupcións na atención sanitaria, as dificultades económicas e outros factores sociais durante ese período de emerxencia sanitaria.
Só en 2021 houbo 10,4 millóns de mortes pola variante máis mortal
As mortes en exceso a nivel mundial alcanzaron o seu punto máximo en 2021, con 10,4 millóns de decesos, principalmente debido á aparición de variantes máis mortais da covid, como a Delta, e á considerable presión sobre os sistemas de saúde, explicou nunha conferencia de prensa en Xenebra o director do Departamento de Datos da OMS, Alain Labrique.
En comparación cos niveis que se podían esperar se a pandemia non ocorrese, as mortes globais foron uns 6,2% superiores en 2020 e alcanzaron un máximo do 17,9% en 2021.
As persoas de idade avanzada e os homes representaron unha maior proporción da mortalidade total.
"Vemos que a pandemia reverteu case unha década de avances mundiais na esperanza de vida e a esperanza de vida saudable", explicou Alain Labrique.
Entre 2019 e 2021, a esperanza de vida mundial descendeu de 73 a 71 anos e a esperanza de vida saudable, de 63 a 61 anos, pero posteriormente houbo unha recuperación que permitiu volver aos niveis de 2019.
"En 2023, a esperanza de vida mundial das mulleres volvera aos niveis previos á pandemia, mentres que a esperanza de vida dos homes e a esperanza de vida saudable para ambos os sexos mantéñense lixeiramente por baixo, o que reflicte unha recuperación mundial ampla, pero desigual", sinalou o director do Departamento de Datos da OMS.
