Dúas irmás de Friol preitean nos xulgados sobre quen coidou máis os pais
O testamento tiña unha cláusula relativa aos coidados moi común en Galicia
Unha das fillas demandou para ser declarada herdeira única
A Audiencia Provincial de Lugo considera que o repartimento da herdanza debe ser a partes iguais
Á hora de revisar os testamentos e repartir as herdanzas xorden moitos conflitos. Foi o que aconteceu cunha familia de Friol. Había unha cláusula especial e unha das fillas quería ser herdeira única.
"É unha cláusula moi típica no rural galego. Cando obriga un dos fillos a coidar os pais este queda como herdeiro universal, e neste caso o problema veu porque un dos fillos se postulou como herdeiro universal", sinala Albert Rodríguez Fernández, avogado dunha das irmás.
Pero a outra irmá e un sobriño, fillo dun terceiro irmán falecido, recorreron e mesmo presentaron unha contrademanda. Con todo, a Audiencia Provincial aposta por unha repartición a partes iguais tendo en conta varios factores.
"Houbo unha rede de apoio relativa ao grao de dependencia da muller e a doutrina dos actos propios en relación a que esa persoa xa asumira que o resto de herdeiros tiñan a mesma cota participativa", explica Albert Rodríguez Fernández, avogado dunha das irmás.
Os conflitos polas herdanzas son moi habituais e na rúa moitos centran a importancia de deixalo todo ben atado.
A Audiencia considera que os tres litigantes participaron de maneira relevante nos coidados e que ningún pode quedar coa herdanza en exclusiva. Con todo, neste asunto aínda cabe recurso de casación.
