Pelexa familiar con coitelos, paus e ata unha muleta en Ferrol
Hai unha semana denunciáronse por un intento de atropelo ou unha colisión provocada, segundo quen o conte
A mesma familia xa protagonizou outros incidentes con armas, motoserras e pelexas grupais
Agresión coitelo en man, en plena rúa. Vese na imaxe. O que cambia é a versión segundo quen a conta.
"Sacou unha navalla de grandes dimensións, que era unha navalla boa, e doulle unha coitelada ao meu amigo no tórax", relata un dos implicados.
"A navalla é do outro. Meu pai lánzalle puñadas e meu irmán menor dálle a vara. Meu irmán ía coa bici e miña irmán mandou aos drogadictos a perseguilo e meu pai non vai deixar ao seu fillo menor. Está aí para defendelo", contradí a filla do home que acabou detido.
A reacción chega por parte do amigo, que entra en escena co primeiro que colle á man.
"Eu fun detrás para defender ao meu amigo e fun cunha muleta para darlle con ela e dinlle", recoñece o mozo.
Son familia, fillos e fillas, irmás e medias irmás, parellas e exparellas cun conflito familiar que se vai escribindo por capítulos, e nos que non escatiman en violencia. Así quedou un dos implicados nunha lea anterior.
"O outro día collérono en Esteiro e rabuñáronlle a cara e o pescozo, agora picárono aquí. É un sen vivir, non se pode máis. Todo isto vén dun piso do que se quere facer dono porque ten toxicómanos para cobrarlles a pensión", engade o mozo.
"O piso que ten meu pai é dun amigo que está en prisión e temos a gravación pedíndolle que llo coide porque o quere para a filla", contrasta a parte contraria.
Hai denuncias cruzadas, cada un coa súa versión. Hai só unha semana este incidente puido acabar en traxedia. A policía investiga se foi un atropelo ou un accidente intencionado.
"Apareceu o coche da miña irmá e quíxonos atropelar e avisei a meu pai e recolleunos nas Pías pero apareceron eles e empezaron a golpearnos por atrás, co meu irmán pequeno dentro do coche", asegura a moza.
"Iso é mentira todo porque apareceu co coche, atravesouno e freou en seco para provocar o accidente", nega o condutor.
É un testemuño contra o outro porque son moitos os que ven e escoitan, pero ninguén quere falar. Son unha familia grande, coñecida no barrio, por leas con armas, brancas, de fogo, motoserras ou paus. Hoxe mesmo no xulgado.
Por sorte, quedou en palabras.
