Sánchez esixe reabrir o estreito de Ormuz e preservar "todos os xacementos enerxéticos" en Oriente Próximo

O presidente do Goberno, Pedro Sánchez, esixiu este domingo a apertura do estreito de Ormuz e "a preservación de todos os xacementos enerxéticos" de Oriente Próximo ante a guerra que manteñen Irán e Estados Unidos e Israel desde o pasado 28 de febreiro.

Nunha mensaxe en 'X', Sánchez afirmou que "nos atopamos nun punto de inflexión global" e advertiu de que "unha maior escalada" podería "desencadear unha crise enerxética a longo prazo para toda a humanidade". 

"O mundo non debería pagar as consecuencias desta guerra", agregou.

The Government of Spain demands the opening of Hormuz and the preservation of all the energy sites of the Middle East.

We stand at a global tipping point. Further escalation could trigger a long-term energy crisis for all humanity.

The world should not pay the consequences of…

— Pedro Sánchez (@sanchezcastejon) March 22, 2026

O pasado venres, Sánchez anunciou un plan con medidas, que entraron en vigor este domingo,  para paliar o impacto económico da guerra en Irán e que mobilizarán 5.000 millóns de euros. Durante a súa comparecencia, Sánchez xa alertou de que o conflito estaba a provocar as primeiras réplicas dun terremoto económico de escala global, como no prezo dos combustibles.

O pasado xoves o Consello Europeo deu o seu visto e prace á disposición dalgúns Estados membro da UE para contribuír nos esforzos para desbloquear o estreito de Ormuz e garantir a liberdade de navegación unha vez que "se dean as condicións".