Este domingo entran en vigor as medidas do Goberno para paliar os efectos da guerra

Cargando resultados...

Publicador de contidos

O paquete inclúe rebaixas de impostos, descontos para colectivos vulnerables e axudas para os sectores máis afectados.

Carburantes, gas e electricidade rebaixan o IVE ao 10% nun plan que mobiliza 5.000 millóns

G24.gal 21/03/2026 09:36

As medidas publicadas no Boletín Oficial do Estado foron aprobadas o venres no Consello de Ministros e contan cunha dotación de 5.000 millóns de euros. Incluirán rebaixas de impostos, descontos para colectivos vulnerables e axudas para os sectores máis afectados.

Con estas medidas, que estarán vixentes "o tempo que sexa necesario", segundo o presidente do Goberno, Pedro Sánchez, tentarase mobilizar os recursos necesarios para protexer os cidadáns, axudar as pemes, o sector primario e a industria.

O BOE tamén publica o outro decreto ao que deu luz verde o Consello de Ministros, que establece unha conxelación temporal dos prezos do alugueiro. Neste caso Sánchez recoñeceu que non conta aínda cunha maioría parlamentaria no Congreso dos Deputados para validalo. Apelou á "responsabilidade" dos grupos parlamentarios para aprobar os reais decretos leis.

Medidas que entran en vigor este domingo:

Electricidade

Rebaixa do IVE da electricidade, que pasará do tipo xeral (21%) ao reducido (10%).

Suspensión temporal do imposto de xeración eléctrica, actualmente do 7% e que pagan as compañías.

Rebaixa do imposto especial sobre a electricidade, unha figura fiscal que pagan os consumidores e que pasará do 5,11% actual ao tipo mínimo do 0,5%.

Gas

Redución do 21 ao 10% do IVE do gas natural, os pélets e leña.

Conxelación do prezo máximo de venda do butano e propano.

Carburantes

Rebaixa do 21 ao 10% do IVE do gasóleo, gasolina e hidrocarburos e rebaixa do imposto de hidrocarburos, ata o mínimo permitido na Unión Europea (UE), o que suporá unha rebaixa efectiva de ata 30 céntimos por litro de combustible e uns 20 euros por depósito para un coche medio.

Medidas para colectivos e sectores máis afectados

Bono social eléctrico: mellora do desconto para colectivos vulnerables (do 42,5%) e para vulnerables severos (do 57,5%), ata fin de ano.

Bono social térmico: incremento da axuda mínima a 50 euros.

Garantía de subministración de auga e enerxía.

Axuda directa pagada pola Axencia Tributaria e as administracións forais de 20 céntimos por litro de gasóleo profesional a transportistas, agricultores, gandeiros e mariñeiros e axuda equivalente para a compra de fertilizantes.

Dotar á Comisión Nacional dos Mercados e a Competencia (CNMC) de novas capacidades de supervisión e sanción para que se investigue e se castigue con dureza a quen utilice as axudas para enriquecerse.

Medidas de electrificación e renovables

Deducións no IRPF para a instalación de placas solares, puntos de recarga e bombas de calor, a posta en marcha de novas axudas para a climatización de edificios ou a axilización na instalación de enerxías renovables.

Reforzo do autoconsumo, estendendo de 2 a 5 quilómetros a distancia máxima entre a xeración e o consumo, así como habilitando as entidades locais a promover novas modalidades e comunidades enerxéticas.

Auméntase a capacidade de almacenamento eléctrico mediante baterías, declárase de utilidade pública o bombeo hidroeléctrico e impúlsanse as renovables.

Maior flexibilidade por lei nos contratos de subministración enerxética, para empresas e autónomos.

Deducións no IRPF do 15% para a compra de vehículos eléctricos e enchufables.

No imposto de sociedades, recóllese liberdade de amortización para investimentos en renovables que substitúan equipos fósiles. Tamén se habilita os concellos para bonificar ata nun 50% o IBI para quen instalase sistemas para o aproveitamento térmico ou eléctrico de enerxías renovables, xunto á bonificación de ata o 95% para as obras e instalacións destes sistemas.

Medidas laborais

Prohibición do despedimento nas empresas que reciban axudas públicas relacionadas cos efectos económicos da guerra en Oriente Próximo.

Impulso á entrada en vigor dos plans de mobilidade sostible, ao que estarán obrigadas a ter todas as empresas de máis de 200 persoas traballadoras ou 100 por quenda, para facilitar os desprazamentos do seu persoal ao centro de traballo.

Medidas de vivenda

Conxelación temporal dos prezos do alugueiro.

Prórroga de dous anos dos contratos de alugueiro que acaban entre este 21 de marzo e o 31 de decembro de 2027.