A Feira Rural de San Sadurniño pon en valor os produtos do campo
A localidade celebraba a XVI edición da súa Feira Rural
A Feira Rural de San Sadurniño cumpre dezaseis anos co obxectivo de potenciar e darlle visibilidade ao mundo rural.
"Darlles visibilidade realmente aos pequenos produtores, aos pequenos artesáns e ser un escaparate para todos eles", explica o concelleiro de Desenvolvemento Local de San Sadurniño, Manolo Varela.
Un dos postos fixos na feira é o da Asociación Galega de Froita Autóctona do Eume, que naceu para recuperar froita propia da comarca en perigo de extinción.
"A maioría son descoñecidos para o 90% da sociedade. Aquí expoñemolas para dalas a coñecer e tamén facemos unha pequena degustación coas que están agora para comer e que a xente as avalíe", conta o presidente da AGFA do Eume, Ignacio Bellas Castro.
Paramos tamén no posto da iniciativa Fusquenlla, un obradoiro colaborativo promovido por varios concellos para que produtores e produtoras da comarca poidan transformar e darlles un valor engadido aos seus produtos.
"Con iso fago unha delicia de pementos en aceite de oliva virxe extra, marmeladas de amorodos", enumera, entre outros, a produtora Carmen Caínzos.
A feira ten tamén artigos de segunda man, artesanía e maquinaria, pero os produtos de alimentación son os protagonistas.
O encontro desenvólvese no Arboreto Galego de San Sadurniño, ao carón do río Xuvia.
