Salvamento Marítimo pídelles ás embarcacións prudencia pola presenza de candorcas
As candorcas atacaron o temón dun veleiro en Ribeira e causáronlle problemas a outro barco na Illa de Arousa
Os biólogos da Coordinadora para o Estudo dos Mamíferos Mariños avistaron tamén máis de 30 baleas e un cento de delfíns
Este é un dos últimos incidentes ocasionados pola presenza de candorcas na costa galega este sábado. Os cetáceos atacaron o temón do veleiro de bandeira francesa á altura da illa da Rúa en Ribeira. Na Illa de Arousa outra embarcación tamén se viu en apuros.
"Eu penso que é máis que nada xogando, saben que dándolle ao temón paralizan o barco, para min que é iso", di Isidro Mariño.
O veterano patrón do Chasula advertiu da presenza de sete candorcas a Salvamento Marítimo. É o terceiro ano consecutivo que as encontra con elas.
"Desde que avisamos a Fisterra, nós seguimos coa nosa expedición para ver aves pero aquí xa había catro barcos, sabendo o que hai, hai que ser un pouco precavido. Houbo moitos barcos tamén con rapaces cheos de xente para ir velas, iso é un perigo".
Dende o Centro de Coordinación Marítimo de Fisterra avisaron a todos os navegantes sobre o avistamento de tres grupos diferente de candorcas: un a 15 millas do faro de Corrubedo, outro entre a Illa de Sálvora e a de Arousa e un terceiro no Grove.
"Veñen aquí seguindo o atún, ás veces estamos collendo atún na ría, se entran é na busca de comida". "As candorcas pasan por aquí pouco tempo, poucos días ao ano. Temos que aproveitar para gozar delas e estudalas... Tamén cruzan a estrada xabaríns e cans todos os días", explica Alfredo López, biólogo do CEMMA.
Na procura de alimento tamén se achegan á Fisterra estes días unhas trinta baleas a máis dun cento de delfíns.
