Ryanair aforrará 40 millóns ao ano ao eliminar as tarxetas de embarque físicas

Ryanair só acepta tarxetas de embarque 100% dixitais desde este mércores, poñendo fin ao billete físico, unha medida que estima que supoñerá un aforro de ata 40 millóns de euros ao ano.

Así, a partir de agora, os clientes da aeroliña terán que usar a tarxeta de embarque dixital xerada na súa aplicación myRyanair durante o 'check in' para embarcar no seu voo de baixo custo.

No seu primeiro día de implantación, desde a compañía destacaron que, ata as 13:00 horas, máis de 700 voos engalaron en toda Europa sen atrasos nin interrupcións. Así, segundo a compañía, máis do 98% dos pasaxeiros presentou a súa tarxeta de embarque dixital e ao 2% restante, que facturara en liña antes de chegar ao aeroporto, expedíuselle unha tarxeta de embarque gratuíta nos mostradores do aeroporto. "As opinións dos clientes foron moi positivas, xa que os pasaxeiros puideron pasar os seus teléfonos polos controis de seguridade e as portas de embarque do aeroporto", en palabras de Ryanair.