Rueda destaca Galicia como destino ao que chegan un 28 % de turistas estranxeiros
No que vai de ano case 1,4 millóns de persoas aloxáronse en Galicia, un 3,7 % máis que en 2024
O presidente da Xunta, Alfonso Rueda, destacou este sábado o compromiso do Goberno galego coa promoción internacional de Galicia como destino turístico de calidade, ao que chegaron no que vai de ano un 28 % de turistas de fóra do noso país.
Rueda, que realizaba unha etapa do Camiño Inglés, sinalou en Negreira (A Coruña) que Galicia é "cada vez máis coñecida no estranxeiro" e destacou a importancia de apostar polo turismo, un sector que definiu "como unha parte fundamental" da economía da Comunidade.
Neste sentido, apelou a un modelo de turismo "sostible e ordenado" e convidou tanto a galegos como a españois e visitantes estranxeiros a descubrir Galicia este mes de xuño, para que poidan gozar de "unha forma de vivir diferente, con calidade, con tranquilidade, con estas paisaxes e coa hospitalidade que nos caracteriza".
"Este mes é perfecto para visitarnos porque non hai tanta xente como no verán", declarou o presidente galego
Segundo os últimos datos, no que vai de ano case 1,4 millóns de persoas aloxáronse en Galicia, un 3,7 % máis que en 2024; mentres que o número de pernoitas rexistrou un incremento do 2,5 %, ata os 2,3 millóns.
Cabe destacar que o nivel de demanda internacional é o máis alto da historia, con 653.000 pernoitas de visitantes de fóra das nosas fronteiras.
