Rueda anuncia 15 millóns de euros en axudas para as empresas do mar
Os apoios serán para paliar os efectos da guerra na frota artesanal, acuicultura e transformadoras
A Xunta vai convocar proximamente 15 millóns de euros en axudas para paliar os efectos da guerra de Ucraína en empresas do mar. Anunciouno o presidente Alfonso Rueda nunha visita á planta que ten a pesqueira Profand en Vilargarcía.
Con sede en Vigo, Profand, que ten como principal cliente a Mercadona, dedícase á pesca, acuicultura, e transformación de peixe, cefalópodos e crustáceos en Europa, Estados Unidos, Asia, América do Sur e África.
No 2022 conseguiu a cifra récord de facturación de 929 millóns de euros e investiu 37 en reforzar a súa capacidade industrial, 21 deles na planta de Vilagarcía.
Alfonso Rueda lembrou que a cadea mar-industria xa representa o 5% do PIB galego e comprometeu o apoio da Xunta que as empresas manteñan o seu liderado no sector.
O presidente destacou os máis de 135 millóns de euros de fondos europeos destinados ao sector transformador e a nova liña de axudas que van convocar proximamente para paliar os efectos da guerra de Ucraína nestas industrias.
A Xunta vai dedicar case 15 millóns de euros a estes apoios para a frota artesanal, a acuicultura e as empresas transformadoras dos produtos do mar. Rueda volveulle a reclamar ao Goberno central que rebaixe o IVE de peixe e conservas.
