Unha mercería da Coruña é a cuarta empresa galega con máis presenza en TikTok

As redes sociais son unha parte máis da rutina laboral na Crisálida, un lugar cunha forza evocadora inmensa, tecida entre miles de botóns e fíos atesourados nun almacén no que Ramón, o propietario actual, aínda atopa de cando en vez pequenas xoias en vellas caixas de cartón. Máis de dous millóns de persoas entran neste pequeno mundo a través de TikTok.

"Para min todo o que acontece na tenda é contido: se vén un can, se me cae unha caixa de alfinetes, se chega algunha visita ou atopo unha caixa esquecedida por aí", di Ramón Santos, o propietario.

La Crisálida é a cuarta empresa galega con maior presenza na rede social chinesa. Por diante, unicamente as grandes marcas de Inditex e o Celta. Un éxito que utiliza para reivindicar o valor do comercio tradicional, ese que está en perigo de extinción. La Crisálida vende a máis de trinta países e recibe no seu local do centro da Coruña clientela de todo o mundo.

"Somos un nodo turístico na cidade. Vén moitísma xente de fóra. A semana pasada xuntáronse aquí unha persoa de Tampa, nos Estados Unidos, unha mexicana e un arxentino que viña mercarlle algo á súa muller. E todos estaban na Coruña de paso", comenta.

Xente de paso e clientes de toda a vida encóntranse nesta pequena mercería viral especializada en labores.