Os ladridos dos cans evitan o roubo nunha casa no barrio da Lomba, en Vilagarcía
Os ladridos dos cans evitan o roubo nunha casa no barrio da Lomba, en Vilagarcía
A presenza dos cans, en ocasións, pode funcionar como medida de seguridade para evitar os roubos
O barrio da Lomba, en Vilagarcía, é unha zona tranquila, pero ao falar coa veciñanza constatamos que non sempre é así. A Menchu entráronlle a roubar a iso das oito da tarde. Ela volvía á casa e parou a falar cunha veciña. Cando entrou, descubriu os estragos.
Carmen leva medio século vivindo no barrio. A ela entráronlle a roubar hai anos, mentres ía ao mercado. Saltaron a reixa e accederon á casa.
Esta mesma semana, no barrio volveuse falar dos roubos. Contan que o suposto ladrón intentou entrar nunha casa, pero os ladridos dos cans alertaron os habitantes da vivenda e frustraron o delito.
A presenza dos cans, en ocasións, pode funcionar como medida de seguridade para evitar os roubos. Como lle ocorre a Mari Carmen, que confía plenamente no instinto do pequeno Darco.
"Este se vén alguén distinto da rúa, si que controla. Rosma e ládralle, avísame sempre que vén alguén que non é do edificio", relata Mari Carmen.
Darco é a proba de que non importa o tamaño á hora de ser un bo can de garda.
