Detidos dous mozos en Ourense por tratar de roubar nunha vivenda forzando portas e fiestras

A Policía Local de Ourense detivo esta fin de semana a dous mozos, unha muller de 24 anos e un home de 26, como presuntos autores dun delito de roubo con violencia en grao de tentativa ao ser sorprendidos tratando de entrar nunha vivenda forzando portas e fiestras.

Os feitos ocorreron na madrugada deste domingo na rúa do Ensino, onde varios veciños alertaron de que unha parella estaba a tratar de entrar nun piso.

Á súa chegada, os axentes interceptan á muller, mentres que o home emprendeu a súa fuxida a través de patios interiores e distintos espazos de edificios próximos, sendo localizado na rúa Xesús Soria, oculto nunha cheminea, polo que se precisou a intervención dos bombeiros.

Os policías comprobaron danos en accesos e fiestras e acharon diversas ferramentas susceptibles de ser utilizadas para forzar as entradas, como unha panca, un martelo ou chaves de parafusos. Tamén foron recuperadas varias tarxetas bancarias cuxa procedencia deberá ser determinada no marco das correspondentes dilixencias.

Por todo iso, ambos foron detidos.

Furto con violencia

Tamén esta fin de semana, o sábado sobre as 11:50 horas, a Policía Local de Ourense foi alertada por un furto nun establecemento comercial do centro. Unha vez alí, os responsables da tenda indicaban que unha muller abandonara o lugar sen efectuar o pago dunha chaqueta valorada en case 170 euros.

A peza puxo ser recuperada e quedou novamente baixo a custodia do establecemento e a muller non foi detida aínda que si identificada, instruíndose as correspondentes dilixencias para xuízo rápido.