Román Rodríguez cualifica de "noxento" o caso de Ron e esixe apartar os agresores "de por vida" das aulas

O conselleiro de Educación, Román Rodríguez, cualificou este xoves de "absolutamente despreciable, absolutamente inxustificable e absolutamente noxento" o caso de abusos sexuais continuados a unha menor por parte do exprofesor e exdeputado Xabier Ron.

En concreto, a sede compostelá da Audiencia Provincial da Coruña condenou a nove anos e medio de prisión ao que fose deputado autonómico do grupo Alternativa Galega de Esquerda (AGE), Xabier Ron, por agredir sexualmente de forma continuada a unha nena de 12 anos da que fora profesor.

En declaracións aos medios este xoves nun acto no Porriño, o titular de Educación defendeu que un docente que comete este tipo de actos contra un alumno debe ser "apartado para sempre" do sistema educativo.

Neste sentido, avanzou que a Xunta de Galicia vai estudar " e analizar" as posibilidades xurídicas e administrativas pertinentes para garantir que un profesor condenado por abusos a menores "non volva pisar nunca unha aula".

Rodríguez incidiu en que a sociedade debe actuar de forma "sa" para impedir o retorno destas persoas aos centros escolares, subliñando que sería "inxustificable" que alguén con estes antecedentes puidese volver exercer a docencia no futuro.