Polo menos 14 mortos e 121 feridos nun ataque ruso con drons contra un centro comercial en Ucraína

Polo menos 14 persoas morreron e outras 121 resultaron feridas, entre elas 22 nenos, nun ataque ruso con drons contra un centro comercial na cidade de Krivi Rig, na rexión ucraína de Dnipropetrovsk, que o presidente ucraíno, Volodímir Zelenski, cualificou de "golpe absolutamente cínico e covarde".

"Os rusos asestaron un golpe absolutamente cínico e covarde contra un centro comercial en Krivi Rig. Os drons atacaron en dúas ondas: media hora despois do primeiro impacto e do incendio, produciuse un segundo ataque contra os servizos de rescate", denunciou Zelenski nunha mensaxe en Telegram.

Entre os feridos, 29 atópanse en estado grave, incluídos cinco nenos. Oito pacientes, entre eles un neno, están a ser operados actualmente, informou Oleksandr Ganzha, xefe da administración militar rexional de Dnipropetrovsk, quen engadiu que aínda hai persoas desaparecidas. 

"Este tipo de ataques son, sinxelamente, un acto terrorista. E a comunidade internacional debe reaccionar ante eles como corresponde: cunha presión real sobre o agresor. Para que poida haber paz, é necesario que Rusia asuma unha responsabilidade real", instou Zelenski.

O presidente ucraíno compartiu fotos dos equipos de bombeiros no centro comercial.