Rexeitamento unánime das administracións en Conxemar ao veto á pesca de fondo

Goberno de España, Xunta de Galicia e Concello de Vigo amosaron este martes o seu rexeitamento unánime ao peche decretado pola Comisión Europea á actividade pesqueira de fondo en 87 zonas do Atlántico. Foi na inauguración oficial en Vigo da feira internacional Conxemar, un evento que reúne 700 empresas de 42 nacionalidades.

“É urxente corrixilo”, dixo a secretaria xeral de Pesca, Alicia Villauriz, quen explicou con cifras a importancia de que España, e tamén Europa, manteñan un nivel suficiente de abastecemento e soberanía alimentarios que garantan a seguridade alimentaria da rexión.

“Por iso resulta se cabe máis inexplicable que se impulsen normas como o Regulamento executivo sobre os ecosistemas mariños vulnerables, que apunta xustamente na dirección contraria, limitando a utilidade da frota pesqueira e, o que é peor, facéndoo sen xustificación”, engadiu Villauriz.

O presidente da Xunta, Alfonso Rueda, recoñeceu a implicación do Ministerio de Pesca e do seu ministro, Luís Planas, para tratar de reverter un regulamento que cualificou de “ameaza” para as embarcacións galegas e españolas.

“Non podemos compartir nin a forma nin o fondo desta posición que é extremadamente prexudicial”, dixo Rueda, para quen “unha decisión desta envergadura non se pode tomar de maneira unilateral” nin carecendo de argumentos técnicos, científicos e socioeconómicos "solventes".

Pola súa banda, o alcalde de Vigo, Abel Caballero, incidiu en que ninguén mellor que os profesionais do mar perseguen a sustentabilidade ambiental, que ha de ser compatible coa sustentabilidade económica.

Tomouse unha decisión “con pouco sustento científico e unha visión desequilibrada e nesgada”, dixo Caballero.

Por último, o rexedor afirmou que o Goberno de España debería facerse cargo da demanda xurídica e da defensa dos intereses do sector, e instouno a que “pida a suspensión cautelar do decreto de augas profundas neste mesmo momento”.