Reto solidario para visibilizar a cativada que precisa unha familia de acollida

Este domingo comezaba este reto solidario para darlle visibilidade ao labor que realizan desde a Asociación Galega de Familias de Acollida. 

Peio Ormazabal e o seu equipo partían da praia da Madalena, en Cabanas, para despois desde a rocha da Marola, en Oleiros, regresar nadando nun traxecto duns 16 quilómetros.

Peio leva anos colaborando con diferentes causas solidarias e el mesmo foi pai de acollemento.

"Isto é totalmente por amor, para recadar para os cativos, para da visibilidade e sobre todo porque fan falta pais e nais de acollida", di Peio Ormazabal, colabora con ACOUGO e foi pai de acollida.

O vento, as mareas, a temperatura e o cansazo converteron a travesía nunha demostración de forza e resistencia.

"Temos vento de nordés que leva cara Sada e logo a marea en contra, quería facelo en 6 horas pero pode levarme 8 horas tranquilamente. Eu estou preparado mentalmente mellor ca nunca", engade Peio Ormazabal.

Peio superou o percorrido mentres arrastraba un caiac de seguridade no que que transportaron nenos e nenas do sistema de protección de acollida. Estiveron pendentes Salvamento Marítitmo e A Cruz Vermella.

"Un dos dereitos fundamentais dos nenos e nenas é medrar nunha familia e outro dereito fundamental é o dereito ás súas orixes. A lei prohibe que as nenas e nenos menores de tres anos estean en centros e recomenda que os menores de seis anos non estean en centros e temos máis de cen cativos menores de seis en centros neste momento en Galicia", asevera Carmen Dourado, directora de ACOUGO (Asociación Galega de Familias de Acollida) e nai de acollida.

"Fun pai de acollida de dous nenos, este reto é por amor", engade Peio Ormazabal.

Despois de varias horas nadando, da fatiga e do sufrimento físico... o esforzo pagou a pena.