Restablecida a circulación ferroviaria entre Ourense e O Irixo tras os incendios provocados polo paso dun tren
Restablecida a circulación ferroviaria entre Ourense e O Irixo tras os incendios provocados polo paso dun tren
Imaxe do incendio de Amoeiro, que xa está extinguido (TVG)
A circulación ferroviaria entre Ourense e O Irixo quedou restablecida durante a madrugada deste martes despois de verse afectada polo paso dun tren que provocou varios incendios. Esta incidencia obrigou a interromper o paso de trens de ancho convencional que circulan entre Ourense e Santiago de Compostela na tarde do pasado luns, aínda que non afectou os trens de alta velocidade, informa Adif.
✅️Se reanuda la circulación. https://t.co/l85lGAkUjX
— INFOAdif (@InfoAdif) July 14, 2026
Pola súa banda, fontes da Consellería do Medio Rural informan a Europa Press que dos oito incendios rexistrados por este motivo o pasado luns só quedan sen extinguir dous: un en Untes, que queima catro hectáreas e está controlado, e outro en Maside, que calcina entre tres e catro hectáreas e está estabilizado.
O paso dun tren pola liña convencional sobre as 14:00 horas provocou ata oito incendios nos municipios de Maside, onde se orixinaron catro focos, Ourense, dous lumes, Amoeiro e Punxín na tarde do pasado luns, segundo Medio Rural.
Na súa extinción traballaron múltiples medios, entres eles as Brigada de Reforzo en Incendios Forestais (BRIF) e helicópteros bombardeiros do Ministerio para a Transición Ecolóxica. Iso, segundo destaca a Delegación do Goberno, de forma coordinada co dispositivo autonómico.
As columnas de fume do incendio de Untes puidéronse ver desde a cidade de Ourense.
Incendios en Laxe e Ribas de Sil
Mentres, continúa estabilizado o incendio de Ribas de Sil, parroquia de Soutordei, tras arrasar 180 hectáreas. Comezou na tarde do sábado. Foi necesario declarar a Situación 2 como medida preventiva pola súa proximidade a Chenzas, unha alerta que quedou desactivada na madrugada do domingo.
Pola súa banda, permanece controlado desde as 23:37 horas do domingo o incendio rexistrado nos municipios coruñeses de Vimianzo e Laxe, que se fundiu nun único lume, tras se uniren os iniciados na parroquia de Salto, en Vimianzo, e o de Nande, en Laxe. Afecta en conxunto a unhas 220 hectáreas.
