Renfe programa autobuses do 17 ao 29 de xuño entre Ourense e Santiago por obras no viaduto do Ulla
Adif levará a cabo os traballos de renovación no viaduto co obxectivo de mellorar a súa fiabilidade e durabilidade
Os servizos modificados serán o rexional con saída de Ourense ás 16:47 horas, e o rexional con saída de Santiago de Compostela ás 18:47 horas
Renfe habilitará un servizo alternativo de transporte por estrada con motivo das obras que Adif levará a cabo entre o 17 e o 29 de xuño no viaduto sobre o río Ulla, situado entre as estacións de Vedra Ribadulla e Bandeira.
A compañía destaca que garantirá a mobilidade dos viaxeiros coa programación de 34 autobuses durante o prazo previsto de execución das obras.
Adif vai renovar integralmente este viaduto, sinala, co que mellorará "a súa fiabilidade e condicións de durabilidade, beneficiando a explotación ferroviaria".
A actuación comprende tres ámbitos, segundo explica: a construción dunha laxa superior de formigón na plataforma ferroviaria para garantir a súa impermeabilización; a rexeneración da estrutura do van principal do viaduto e o tratamento das estruturas das bóvedas dos vans de acceso.
Estes traballos son incompatibles coa circulación ferroviaria por vía convencional, polo que Renfe estableceu un servizo alternativo no tren rexional entre Ourense e Santiago de Compostela.
Os dous servizos modificados serán o rexional '12960', con saída de Ourense ás 16:47 horas e, en sentido contrario, o rexional '12967' con saída de Santiago de Compostela ás 18:47 horas.
Renfe lembra aos viaxeiros que nos traxectos por estrada non está permitido o transporte de animais de compañía nin de bicicletas.
