Raiolas Lugo celebra 25 anos de apoio ás persoas con trastornos do espectro autista
A asociación atende máis dun cento de menores e de adultos con TEA, ademais das súas familias
Raiolas Lugo cumpre 25 anos ao servizo das persoas con Trastorno do Espectro Autista e as súas familias. Para conmemorar este cuarto de século, a asociación celebrou un acto no Vello Cárcere da capital luguesa, que contou cunha nutrida asistencia.
"Non había ningunha estrutura dentro de Lugo e agora levamos 25 anos. O ano pasado abrimos o centro de día, que xa é un grande logro, e o que nos gustaría facer para o futuro é ter vivendas tuteladas, con apoios, para que sigan crecendo e evolucionando", sinala Iván Ignacio Pérez, voceiro de Raiolas.
Actualmente, o equipo de psicólogos, logopedas e terapeutas ocupacionais de Raiolas atende máis dun cento de familias, o que implica máis de 300 persoas, incluíndo os proxenitores e mais os rapaces e adultos con autismo.
.png)