Miles de persoas piden frear a "emerxencia lingüística" que sofre o galego
A manifestación convocada pola plataforma Queremos Galego reclama unha "lingua vital xa!"
Milleiros de persoas saíron ás rúas de Santiago este 17 de maio para pedir que se reverta "a emerxencia lingüística" que sofre o galego tras os últimos datos publicados sobre o seu uso e competencias.
Na tradicional manifestación co gallo do Día das Letras Galegas, convocada pola plataforma Queremos Galego, reclamaron políticas para outorgarlle á lingua propia un lugar central na vida cotiá da cidadanía.
Desta volta, as pandeiretas convertéronse en protagonistas dunha xornada na que se rende homenaxe á poesía popular oral e ás cantareiras, que permitiron que o idioma, en forma de coplas, continuara sendo o transmisor da identidade do pobo galego.
A marcha, que partiu ao mediodía da Alameda compostelá, mudou o percorrido habitual e foi nesta ocasión polas avenidas de Figueroa e Rodrigo de Padrón, a travesía de Fonseca e a rúa do Franco, para rematar na Praza de Obradoiro.
Alí congregáronse máis de 5.000 persoas, que enarboraron as súas pandeiretas e bandeiras e lanzaron proclamas como "Galiza ten futuro en Galego" ou "Na rúa e na escola, galego a toda hora".
Na manifestación participaron diversos colectivos que forman parte de Queremos Galego como A Mesa Pola Normalización Lingüística ou partidos como o BNG, o PSdeG ou Sumar, ademais de sindicatos como a CIG ou CC. OO.
Antes da saída, o portavoz da plataforma, Marcos Maceira, destacou que esta xornada "será histórica e decisiva".
"Non nos resignamos á expulsión da lingua galega da maior parte dos ámbitos da vida social", asegurou.
"Que deixe de traballar en contra do galego"
En declaracións aos medios, a líder do BNG, Ana Pontón, reclamoulle ao Goberno do PP que "respecte o grande acordo sobre a lingua, o Plan de Normalización Lingüística" e "consensúe prazos e orzamento" para executalo.
Ademais, esixiulle ao presidente Alfonso Rueda que "deixe de traballar en contra do galego e o faga a prol da maioría que quere falar a súa lingua propia".
"É necesario modificar o decreto da vergoña na educación, que provocou que unha xeración educada baixo o mesmo, sexa a que menos galego fala da historia", expresou.
Preservar a nosa identidade
O secretario xeral dos socialistas galegos tamén fixo un chamamento a prol da defensa e do coidado da nosa lingua. José Ramón Gómez Besteiro, que participou no acto institucional do 17 de maio, convidou a mocidade a empregar o idioma a diario para preservar a nosa identidade.
"Ao PP e á Xunta, que se sumen a ese proxecto no que todos podamos participar en darlle forza ao noso idioma, que está nun momento moi difícil. Sacalo fóra do ambiente familiar e do ambiente docente, ao ambiente de traballo, nos ambientes de ocio... facer unha chamada a esa mocidade para que utilice o noso idioma. En definitiva, un compromiso colectivo para defender o noso idioma, a nosa identidade, o que realmente somos, non?", asegurou.
