Queixas polos actos de vandalismo en Ribadeo

As pintadas nas pistas de skate de Ribadeo, creadas esta mesma década, están a xerar queixas entre a veciñanza, incluídos os comerciantes. O vandalismo non se limita a este espazo público, senón que tamén lles afecta aos edificios da contorna. 

"A nós non nos gusta, e estamos preocupados. Ao final, a imaxe que se proxecta de Ribadeo non é unha imaxe boa. Que haxa pintadas en espazos públicos, que se vandalicen sinais de tráfico ou turísticos non dá unha boa imaxe. Polo tanto, todo o que se xa previr estas accións delituosas ou este vandalismo é algo positivo", sinala Jesús Pérez, xerente da asociación de comerciantes ACISA Ribadeo. 

A raíz destes actos vandálicos, dende o Concello anunciaron a instalación de novas cámaras de vixilancia, que se suman ás xa existentes no centro da vila. Ademais, dende a Policía Local tamén fan un chamamento ao civismo por parte da cidadanía. 

"Para que colabore e saiba que hai que ter algo de civismo, porque todo este vandalismo que se pode ver, coma as pintadas, cústanos cartos a todos. A súa limpeza sae dos impostos de todos. Que a xente teña civismo e non estrague o mobiliario urbano nin as zonas comúns, posto que son un beneficio para a comunidade", indica Andrés Redondo, xefa da Policía Local de Ribadeo. 

Aínda que se concentran nestas pistas deportivas, noutras zonas de Ribadeo, como Piñeira ou As Catedrais, tamén están a proliferar os actos vandálicos.