Lanzan petardos e ameazan cun pau os acampados pola vivenda en Vigo

O subdelegado do Goberno en Pontevedra, Abel Losada, confirmou este venres que, nas últimas horas, producíronse "dous actos de acoso" cara ao grupo de persoas que están acampadas na Alameda de Vigo, e esixiu "respecto" cara a este grupo, cuxa conduta é "pacífica e irreprochable", á vez que advertiu de que a Policía actuará no caso de que se repitan eses actos.

En declaracións remitidas aos medios, Losada explicou que, sobre as 5:00 horas da pasada madrugada, dous homes e unha muller guindaron petardos cara aos acampados, e que sobre as 7:00 horas un home "ameazounos a berros brandindo un pau". "En días pasados houbo outros dous incidentes parecidos", sinalou.

"Quero recalcar que no tempo que levamos de acampadas pola vivenda, primeiro en Pontevedra e logo en Vigo, non recibín ningún parte policial sobre comportamentos inapropiados dos acampados, polo que a súa conduta é, no que a min respecta, absolutamente pacífica e irreprochable", subliñou o subdelegado.

Ao respecto, apuntou que as persoas acampadas "están a exercer o seu dereito de reunión e reivindicando un dereito previsto na Constitución". Así mesmo, confirmou que cumpriron co requisito de comunicación previa á Subdelegación do Goberno. Por iso, esixiu "respecto" cara a estas persoas e advertiu de que se algunha persoa "se achega para molestar, fustrigar ou con ánimo de agredir" e é identificada pola Policía Nacional, "actuarase sen titubeos", ben no ámbito da sanción administrativa ou no ámbito penal, "en función da gravidade dos feitos".

Pola súa banda, os participantes na protesta trasladaron o seu agradecemento á cidadanía polas mostras de apoio recibidas nos últimos días porque "a súa loita é a loita de todos".

"Queremos que saibades que non imos participar nas provocacións que unha minoría violenta profire contra nós e subliñamos unha vez máis que estamos moi moi contentas de sentir o cariño da inmensa maioría dos veciños de Vigo e doutras cidades, vilas e aldeas que nos apoian", insistiron. Sobre as declaracións de Losada, apuntaron que rexeitar as actitudes agresivas "é unha obrigación de toda a cidadanía".