Profesionais trasladan a oficina ás cafeterías fronte ao illamento do teletraballo no fogar
Cada vez son máis os hostaleiros que facilitan espazos diferenciados nos seus locais
Espazos onde tomar un café ao tempo que se mantén unha xuntanza virtual. Nalgunhas cafeterías situadas a carón do paseo marítimo da Coruña facilitan o teletraballo.
"Non temos mesas designadas. Si hai mesas grandes que cando hai moita xente no local, por exeplo os sábados que está a rebentar, pedimos se non lles importa colocarse nunha mesa de dous e xa está", explica Óscar Vales, cofundador de We Sustainability.
Integrado nun proxecto de sostibilidade ambiental, o local ofrece, entre os seus servizos, conexión gratuíta á Rede.
"Gusto moito de estar aquí pola tranquilidade, por saír un pouco da casa, mirar o mar, mirar outras persoas e por estar máis na sociedade", comenta un dos usuarios da cafetetería que teletraballa.
Óscar Vales engade que se trata "dunha cafetería diferente onde temos unha comunidade amplia e a xente vén a teletraballar e outra vén leer e outra a participar nas limpezas de praias".
Realidade distinta é a cafetería de Uxía. Un pequeno local no centro da cidade que tivo que limitar o uso do teletraballo. Uns carteliños nas mesas indican: zona libre de traballo.
"Un sitio tan pequeno con tres mesas non era tan rentable e ao final decidimos pasar a xente que traballa co ordenador á zona da barra", sinala.
Un xeito de facer compatible a actividade do negocio cunha clientela á que lle gusta teletraballar, pero fóra da casa.
