Todo preparado para a Reconquista de Vigo

Ringleiras en moitas tendas de Vigo para facerse cos últimos detalles do traxe para celebrar a Reconquista. Ana Lores, da mercería Crespo, explica que os clientes buscan "panos, chalecos, saias, medias, zapatos, vendemos de todo. A veces a xente ven buscando saias vistosas de cadros ou flores, que confeccionamos tamén nós para outras datas como seráns e foliadas... Temos que facer unha labor de concienciación porque eses tecidos non os había no 1800.

Tamén están cheos os almacéns de bares e restaurantes que se preparan para atender os milleiros de visitantes que se agardan durante a fin de semana. Mario Alejandro Yáñez traballa no bar La Central e destaca que "chegou máis mercancía, sobre todo moita cervexa e choripans", algo semellante pasa en Elaine Restaurante de tapas, alí Manuel Antonio Covela relata que teñen "bastante mercancía por se ven moita xente, moita cervexa, refrescos e comida"

As previsións dos hoteis da cidade tamén apuntan alto e aínda reciben reservas para a fin de semana. É o caso do Gran Hotel nagari. Rocío Porto, relacións públicas do establecemento, detalla que están "esperando encher, quedan algunhas habitacións aínda, pero esperamos enchelas. É unha festa moi importante"

Para viaxar no tempo ata 1809, e vivir a expulsión das tropas francesas, a organización reconstrúe a zona vella. Fiz Axeitos, portavoz da Asociación veciñal e cultural Casco vello de Vigo, insica que xa están "acabando de montar as estruturas que nos corresponden, traballamos dende novembro e hai cousas que se encargan dun ano para outro".

Os participantes xa teñen ensaiada a gran representación da Reconquista de Vigo, que será o domingo ás seis da tarde.