Prisión sen fianza para o autor do tiroteo na gasolineira de Vilamarín
Está investigado por un delito de intento de asasinato e outro de tentativa de homicidio
A principal hipótese dos investigadores é un axuste de contas por unha relación non consentida por parte da familia ferida no tiroteo
Declara nos xulgados de Ourense o único detido polo tiroteo en Tamallancos
A maxistrada do Xulgado de Instrución número tres de Ourense decretou o ingreso en prisión comunicada e sen fianza para o detido polo tiroteo na gasolineira de Vilamarín.
Segundo confirmaron fontes do Tribunal Superior de Xustiza de Galicia, o autor do tiroteo está sendo investigado por dous delitos, de intento de asasinato e outro de tentativa de homicidio, despois de pasar a disposición xudicial na cidade de Ourense.
O home de 48 anos, veciño de Amoeiro, foi arrestado o pasado martes como presunto autor dun tiroteo rexistrado nunha gasolineira a Vilamarín, que rematou con catro persoas feridas.
Os investigadores pensan que o home abriu fogo cunha escopeta contra varias persoas e as perseguiu cando buscaban refuxio no local da estación de servizo.
Tres dos feridos pertencen a unha mesma familia de etnia xitana, o pai, a nai e un fillo ademais dunha cuarta persoa, en concreto, un cliente que se atopaba nese momento no establecemento.
A principal hipótese que barallan os investigadores é un posible axuste de contas por unha relación non consentida por parte da familia.
