León XIV acode á tumba de Francisco tras visitar por sorpresa un santuario agostiño
O pontífice reuniuse este sábado cos cardeais e o domingo presidirá o rezo do Regina Coeli en San Pedro
No seu encontro cos purpurados confirmou que vai seguir a "valiosa herdanza" do seu antecesor
O Papa recibirá o 18 de maio o anel do pescador e o palio na misa que marca o inicio do pontificado
León XIV visitou na tarde deste sábado a tumba de Francisco, para orar en privado, logo de visitar por sorpresa un santuario agostiño na localidade de Genazzano, próxima a Roma.
Foi o remate dunha xornada que comezou cun encontro cos cardeais no Vaticano. Durante a xuntanza, manifestoulles o seu desexo de seguir a "valiosa herdanza" de Francisco.
Neste sentido, o pontífice subliñou a importancia con vistas ao futuro do "coidado amoroso dos débiles" e do diálogo "valente e confiado co mundo contemporáneo".
Nome papal
León XIV tamén confirmou que adoptou o seu nome papal polo exemplo de León XIII, autor da histórica encíclica Rerum novarum, na que afrontou a cuestión social no contexto da primeira gran revolución industrial.
A reunión, a porta pechada e da que informou a Santa Sé mediante un comunicado, formulouse tamén como un diálogo, solicitado por "moitos cardeais", para facerlle chegar "consellos, suxestións e propostas concretas".
O Papa dixo que estes últimos días foron "dolorosos" pola morte de Francisco e transmitiulles aos cardeais as razóns que o levan a aceptar "un xugo que claramente supera non só as miñas forzas, senón as de calquera outro".
O Papa reunido cos cardeais este sábado. VATICANO vía REUTERS
Valiosa herdanza
Un papa, asegurou Robert Francis Prevost, é "un humilde servo de Deus", como demostran os seus antecesores, entre eles Francisco, "co seu estilo de total dedicación ao servizo e de sobria esencialidade de vida".
"Recollamos esta valiosa herdanza e retomemos o camiño" do pontífice anterior, dixo León XIV, quen subliñou que nestes días sentiu "a forza desta inmensa comunidade que, con tanto afecto e devoción, despediu e chorou" a Francisco.
Nesta liña, expresou o seu desexo de renovar xuntos a "nosa plena adhesión á vía que desde hai xa decenios a Igrexa universal está a percorrer tras as pegadas do Concilio Vaticano II".
León XIV fala no encontro cos cardeais. VATICANO vía REUTERS
Visita por sorpresa
A continuación, León XIV visitou o santuario agostiño da Madonna do Buon Consiglio na localidade de Genazzano, próxima a Roma, segundo informan medios locais.
Esta visita, que non fora anunciada pola Santa Sé, é a primeira saída do pontífice desde que o xoves foi elixido xefe da Igrexa católica tras dous días de conclave.
Á súa chegada ao municipio, o Papa foi recibido polo bispo da diocese e as autoridades locais.
O Papa no santuario agostiño. FOTO: Administración de Genazzaro vía REUTERS
Rezo ante a tumba de Francisco
Antes de regresar ao Vaticano, León XIV foi rezar ante a tumba do seu antecesor. Robert Francis Prevost, moi próximo a Jorge Bergoglio, acudiu á basílica romana de Santa María a Maior, onde está enterrado Francisco polo seu expreso desexo.
Á súa chegada ao templo, foi recibido con aplausos e berros de "viva o papa!".
Lema do escudo papal
Por outra banda, a Secretaría de Estado vaticana difundiu na rede social X o lema que aparece no escudo papal de león XIV. É unha frase de Santo Agostiño, In illo uno unum, que se pode traducir como "Nel somos un".
Trátase dunha frase que evoca unha expresión de Santo Agostiño sobre o salmo 127 e co que se quere afirmar que en Cristo todos os cristiáns son un só.
O pontífice chega a Santa María a Maior. REUTERS/Yara Nardi
Rezo do Regina Caeli
A vindeira aparición pública do pontífice será este domingo 11, cando ao mediodía presida o rezo do Regina Caeli, que substitúe o Angelus en período pascual, desde a loxia central da basílica de San Pedro.
O luns 12 de maio, León XIV concederá unha audiencia aos medios acreditados reunidos en Roma nas últimas semanas para cubrir os acontecementos desde a morte do papa Francisco ata o conclave.
Misa de inicio do pontificado
A misa de inicio do pontificado do papa León XIV celebrarase o domingo 18 de maio ás 10:00 horas, na praza de San Pedro, segundo anunciou a Prefectura da Casa Pontificia.
Agárdase que nesta cerimonia, na que recibe o anel do pescador e o palio, símbolos do poder pontificio, participen delegacións e xefes de Estado de todo o mundo.
León XIV en Genazzaro. FOTO: Francesco Sforza/Vaticano vía REUTERS
Primeira audiencia xeral
O día 21 de maio terá lugar a primeira audiencia xeral dos mércores e o sábado 24 atoparase coa Curia romana e o persoal do Estado da Cidade do Vaticano.
Un día despois, o domingo 25 de maio volverá presidir o Regina Caeli e despois tomará posesión das basílicas papais de San Xoán de Letrán e Santa María a Maior.
O Papa no balcón de San Pedro este xoves. REUTERS/Guglielmo Mangiapane
