A auga das Burgas, boa contra a acne
Así o revela un estudio realizado por unha estudante de enfermería de último ano
O tratamento consistiu en 14 lavados tópicos con estas augas termais ao longo dun mes
A investigación foi levada a cabo por Nerea Dorado e estivo titorizada pola catedrática Reyes Pérez. O lugar elixido para desenvolver o seu estudo foi aquí, nas Burgas de Ourense. Unhas trinta persoas, de 18 a 25 anos, sometéronse a un tratamento sinxelo e natural. O único requisito, ter acne común. Nerea Dorado é a titular deste traballo de fin de grao.
"Aplicar eses catorce lavados tópicos ao longo dun mes de maneira seguida ou alterna. Tiñan que vir aquí á fonte termal das Burgas, recoller a auga nun recipiente de cristal, esperar a que arrefriara e poñela na cara".
"Realmente sorprendeunos porque o efecto foi moi grande. Houbo rapaces aos que lles desapareceu a acne".
Reyes Pérez leva anos traballando para o departamento de Investigación e Termalismo de Ourense. Xa coñecen os beneficios terapéuticos que estas augas, as das piscinas termais das Burgas, tiveron en enfermos de fibromialxia ao longo de case un ano, evitando tratamentos e mellorando cualitativamente a súa calidade de vida.
Respecto a estes pacientes con acne, elixidos para este outro estudo, os resultados revelan que estas augas termais lles axudaron a rexenerar, cicatrizar e desinflamar a pel afectada grazas á súa microbiota. Reyes Pérez explícanos as súas propiedades.
"Esa auga, grazas a eses microorganismos, son capaces de facer estes cambios tan impresionantes por exemplo a nivel da pel".
"Houbo xente que antes non era capaz de saír á rúa nin cunha gota de maquillaxe, e agora grazas a isto a súa calidade de vida mellorou", segundo Nerea Dorado.
Para o departamento de Investigación e Termalismo de Enfermería de Ourense, este estudo non remata aquí. Haberá máis ensaios clínicos para saber canto pode durar o seu efecto. O obxectivo é o de ofertar unha opción sostible, natural e accesible ao alcance de todo o mundo.
