Prisión cautelar para acusados de tráfico de persoas no naufraxio con centos de mortos en Grecia

A Fiscalía grega ditou prisión preventiva para os nove acusados de tráfico de persoas polo naufraxio a semana pasada dun barco con centos de refuxiados e migrantes a bordo, dos que ata o de agora se recuperaron 82 cadáveres.

Tras declarar durante 13 horas, a Fiscalía da cidade grega de Kalamata ditou a última hora do martes prisión preventiva para os nove homes, de nacionalidade exipcia, acusados de tráfico ilícito de migrantes, causar un naufraxio, homicidio neglixente e poñer vidas en perigo.

Os nove, que se contan entre as 104 persoas rescatadas do naufraxio, negan pertencer a unha rede de tráfico de persoas e declararon que pagaron como o resto de migrantes para realizar a viaxe no ateigado pesqueiro, segundo publica o diario Efsyn.

Segundo os testemuños dos rescatados, unhas 700 persoas, a metade cidadáns de Paquistán, viaxaban no barco, entre elas moitos nenos e mulleres, nunha das maiores traxedias de refuxiados rexistradas no Mediterráneo.

Mientra seguen as operacións de busca ao suroeste da península do Peloponeso, onde a madrugada do pasado mércores naufragou o barco, sen que haxa posibilidade de que se atope alguén con vida.

As autoridades recuperaron onte un cadáver máis na zona, polo que a cifra oficial de falecidos é xa de 82.

A embarcación partiu de Exipto, fixo unha escala no leste de Libia, onde embarcaron os migrantes, e despois seguiu rumbo a Italia.