Premian unha aplicación de axuda aos nenos con autismo deseñada por un mozo vigués

Lucas Alonso de San Segundo está nesa idade en que todos queremos cambiar o mundo. Cando a ese nobre desexo se suma un talento innato como o que el ten para a informática, xorden cousas como o seu proxecto de fin de grao, que á vez é un exemplo do que é a tecnoloxía inclusiva: Rutirse.

"A idea era coller o inicio das palabras rutinas, ironías e sentimentos, o que dá como resultado a palabra rutirse", contounos Lucas. "Vexo a posibilidade de axudar á xente e iso creo que é algo bonito e guai."

Lucas empregou 370 horas en deseñar Rutirse, e estivo en contacto permanente con distintas asociacións que traballan con persoas do espectro autista. O seu obxectivo era adaptar á pantalla da tableta os clásicos xogos de tarxetas que se empregan coas persoas que padecen este trastorno á hora de fomentar neles patróns de rutina. Pero tamén ir máis aló e usalos para traballar no aspecto emocional.

"Tiven unha reunión con Aspanaes, unha asociación de aquí da Coruña. Presentámoslles a aplicación, quedaron contentos, gustoulles bastante", explicounos.

Mentres Aspanaes axudaba a Lucas a pulir algúns aspectos co feedback que lle daban os seus terapeutas e usuarios, Rutirse era recoñecido cun dos premios Xovetic, que cada ano valora os mellores proxectos de investigación en tecnoloxías da información e a comunicación. Pero Lucas xa está pensando no seu seguinte proxecto inclusivo.

"É para axudar a nenos e nenas que presentan parálise cerebral unilateral, o que me parece un traballo moi interesante e de grande axuda", confesounos Lucas.

Mozos como Lucas marcan as diferenzas. O futuro é seu.