Indra toma o control da viguesa Sparc Foundry, a primeira planta de chips fotónicos de España

A empresa Sparc Foundry recibirá 17,2 millóns de euros da Sociedade Española para a Transformación Tecnolóxica (SETT). Esta achega, aprobada no Consello de Ministros a proposta do Ministerio de Transformación Dixital e da Función Pública, enmárcase no proxecto estratéxico Perte Chip.

O financiamento permitirá consolidar o proxecto da compañía para fabricar semicondutores fotónicos e reforzar a aposta española por unha industria considerada estratéxica para Europa.

Nova planta no Parque Tecnolóxico de Valadares

A achega da SETT representa o 43,9 % da ampliación de capital de Sparc Foundry e facilitará a posta en marcha dunha planta no Parque Tecnolóxico de Valadares, en Vigo. A compañía prevé que estea plenamente operativa no segundo semestre de 2027.

Sparc asegura que esta instalación será pioneira en Europa na produción de 20.000 obleas ao ano con materiais III-V, como fosfuro de indio (InP), arseniuro de galio (GaAs) e nitruro de galio (GaN), fundamentais para sectores con alta demanda tecnolóxica.

Ademais da planta de fabricación, a empresa contará cun centro tecnolóxico para a transferencia de coñecemento e un centro de formación.

Creará 750 postos de traballo

A compañía estima que o proxecto xerará 200 empregos directos de alta cualificación e 550 indirectos.

Os chips fotónicos que producirá terán aplicación en telecomunicacións, automoción, computación cuántica, medicina, electrónica de consumo e defensa.

Sparc Foundry naceu da man do doutor e investigador en fotónica integrada Francisco Díaz, o catedrático Carlos Mosquera, os doutores en óptica Francisco Soares e José Pozo, e o experto en planificación financeira Eladio Crego.

O proxecto colleu impulso co apoio do Consorcio da Zona Franca de Vigo, que licitou a construción da planta, e coa inversión de Vigo Activo.

Indra adquire o 37% de Sparc por 20 millóns de euros e convértese no seu maior accionista

O grupo Indra investiu 20 millóns de euros para adquirir o 37 % da empresa galega Sparc e converteuse no seu principal accionista.

A operación realizouse no marco dunha rolda de investimento na que tamén participaron a Sociedade Española para a Transformación Tecnolóxica (SETT) e Vigo Activo.

Coa súa entrada, Indra lidera en España o deseño e produción de chips fotónicos, unha tecnoloxía clave para garantir a soberanía tecnolóxica e a autonomía estratéxica europea.

A operación implica unha valoración de Sparc de aproximadamente 54 millóns de euros.