Por alto risco, o Racing non permitirá camisetas do Deportivo fóra da bancada visitante
O Racing de Ferrol puido habilitar o fondo co que o número de localidades dispoñibles para a afección deportivista pasa das 866 inicialmente anunciadas a 1.866
O partido entre Racing de Ferrol e Deportivo foi declarado de alto risco. Por este motivo desde a entidade anunciaron que "por motivos de seguridade, fóra da Bancada Visitante non estará permitido portar ningunha indumentaria do Club visitante (camisetas, bufandas…)".
En definitiva, que só permitirán indumentaria deportivista na bancada habilitada para os seareiros do Deportivo, non podendo lucir ningún distintivo branco e azul fóra dela.
Mentres, desde o Deportivo activaron a reserva previa de entradas para este partido. Como anunciaron desde o club, o Racing de Ferrol puido habilitar o fondo co que o número de localidades dispoñibles para a afección Deportivista pasa das 866 inicialmente anunciadas a 1.866. Destas, 746 serán xestionadas directamente pola Federación de Peñas en virtude do acordo existente entre ambas as entidades.
