Ponteareas convoca un minuto de silencio polo asasinato dunha muller a mans do fillo
O Goberno local condena o sucedido e expresou a súa "consternación e dó" pola tráxica morte desta veciña
O Concello de Ponteareas convocou para este mediodía toda a cidadanía a participar nun minuto de silencio que terá lugar fronte as portas do consistorio local en sinal de dó pola morte dunha veciña de 81 anos este domingo a mans, presuntamente, do seu fillo.
Nun comunicado, o Goberno local manifestou a súa "máis profunda consternación, dor e enérxica condena ante o tráxico asasinato". Puxo todos os recursos municipais á disposición da familia e brindoulle a súa colaboración ás autoridades sanitarias e xudiciais para o total esclarecemento dos feitos.
Este domingo a primeira hora da tarde un home, duns 60 anos, confesou que matara presuntamente a súa nai con arma branca.
O presunto autor do crime foi detido e permanece internado no Hospital Álvaro Cunqueiro de Vigo.
O home, con antecedentes psiquiátricos, está pendente de pasar á disposición xudicial.
.png)
.jpg)
