Polo menos catro detidos nunha operación antidroga no Salnés
Polo menos catro detidos nunha operación antidroga no Salnés
As Forzas de Seguridade realizaron sete rexistros noutras tantas vivendas e rochos de Vilagarcía de Arousa e Vilanova de Arousa
A Garda Civil, en coordinación co Corpo Nacional de Policía e o Servizo de Vixilancia Aduaneira, detivo catro persoas no marco da operación contra o tráfico de drogas a media escala realizada este martes na comarca do Salnés.
As Forzas de Seguridade realizaron sete rexistros noutras tantas vivendas e rochos de Vilagarcía de Arousa e Vilanova de Arousa, sen que ata o momento transcendese se, ademais dos detidos, comisaron de bens ou dalgunha cantidade de droga.
Segundo fontes da investigación consultadas por Europa Press, os detidos dedicábanse ao transporte de sustancias estupefacientes a nivel intermedio. O tráfico da mercadoría ilícita, normalmente distribuída en fardos dun quilo, facíase por estrada e principalmente entre Galicia e Portugal.
Os catro detidos están a ser interrogados polas Forzas de Seguridade. Segundo as mesmas fontes, é posible que tres deles queden en liberdade mentres que o cuarto, un mozo de 25 anos detido nun céntrico edifico da capital arousá, sexa posto a disposición do Xulgado de Instrución número 3 de Vilagarcía, que instrúe este caso.