Deteñen cando menos seis persoas nunha redada contra o tráfico de drogas en Lugo

A rolda das Fontiñas e o barrio da Piringalla foron os dous puntos de Lugo onde se desenvolveu a última operación policial contra o tráfico de drogas. Na rúa Lavandeira, ao norte da cidade, a raíz das queixas veciñais, os axentes rexistraron unha casa ocupada de xeito irregular. Para levar a cabo a redada, contaron co reforzo de efectivos da Unidade de Intervención Policial chegados dende A Coruña, que participaron na detención de varios ocupantes presuntamente implicados na venda de estupefacientes.

O dispositivo policial saldouse con polo menos media ducia de persoas detidas e coa incautación de numerosos obxectos supostamente subtraídos. Neste sentido, a colaboración cidadá resultou clave para detectar as vivendas onde se estaba a vender droga, como presuntamente foi o caso dun piso no barrio das Fontiñas.

"Era un sitio específico, un inmoble onde ao parecer había problemas por ruídos e por trasfega de xente, polo que parabéns pola actuación policial. Nós pensamos que é un caso illado", sinala Beni Abeledo, presidente da asociación de veciños As Carballeiras. 

"Investigación, pero cos veciños detrás implicándose, indicando que están entrando a tal hora, saen a tal hora, pasa isto...", valora Ricardo Varela, presidente da asociación de veciños San Isidro da Piringalla. 

Non se descarta que se produzan novas detencións en relación con esta redada.