A policía realiza unha macrorredada no maior supermercado da droga en Santiago
Realizáronse rexistros en varias vivendas do coñecido como Banco do Pobre e detivéronse cinco persoas detidas, supostamente as irmás que xestionan o negocio
"Hoxe toca redada", con esta mensaxe empezaron a rular os vídeos da entrada da policía no hipermercado da droga de Compostela, helicóptero e cans incluídos.
"O helicóptero andou por aquí toda a mañá. Estiveron na casa onde se vende, botaron a porta abaixo, e foi un home e pegáronlle a tope. Non sei o que lle colleron nin nada".
Non quere dar a cara porque foi comprador habitual moito tempo, e aínda que asegura que xa non, sabe o que se move dentro e quen o move.
"Elas. Todas elas, son todas irmás as que venden, nunha soa vivenda, a que ten a porta de ferro. Aí cómprase e despois cada un consume onde quere, en calquera sitio. De momento, non se sabe máis nada", engade o home.
Sábese que hoxe alí non se compra. De feito, na zona, na avenida de Barcelona, hoxe hai menos ir e vir de toxicómanos, o que viña sendo a imaxe habitual.
"Hoxe é unha mañá moi tranquila, polo que me din os dos negocios. A xente está moi contenta en principio porque é moi boa nova", confirma Xosé Manuel López, o presidente da Plataforma Santa Marta Segura.
"Nos edificios atopas xente en estado lamentable. Ás veces, non sabes se están mortos porque están en estado lamentable", coincide unha muller que traballa na zona.
Son décadas dun negocio familiar, que foi pasando de xeración en xeración.
"Nacín aquí e aos quince anos xa se vía movemento. Empezou cun señor que embarcou e vese que lle gustou iso da droga, que creo que mesmo estivo no cárcere, e pasoullo á familia e agora lévano as fillas", explica unha veciña.
No barrio celebran a redada, pero con precaución: non é a primeira e temen que non sexa a última.
"Eu penso que non. Ou levan a todos para o cárcere ou se tiran esas casas, ou non vai cambiar nada", lamenta a muller.
"Volverán facelo outra vez. Non van tardar en vender de novo", coincide o que fora cliente do Banco do Pobre.
De momento, apenas transcendeu información oficial, pero fálase de rexistros en tres vivendas e de cinco persoas detidas, suponse que "as irmás". Mañá poderían pasar a disposición xudicial.
