Polémica polo globo de Betanzos, que podería non voar este ano
O globo aínda non comezou a fabricarse
A raíña das festas será substituída polo representante maior
Os cambios nas tradicións sempre xeran diferentes opinións, e Betanzos non é unha excepción. Hai veciños que queren conservalas e outros están máis abertos aos cambios.
Entre os veciños da vila brigantina existe preocupación porque este ano, nas festas de San Roque, poderían quedar sen ver voar o tradicional globo, que aínda non comezou a fabricarse. Terían que estar comezadas as tarefas a finais de xuño e, de momento, non hai constancia de que eses traballos empezasen.
Para case todos, unhas festas sen o globo de Betanzos non serían as mesmas.
O mesmo ocorre coa decisión de eliminar a popular figura da raíña das festas, a que substituirá o representante maior.
A última raíña, Nerea Abruñedo, explica que ela estivo anos na lista de espera e que lle facía moita ilusión ser raíña. Outros veciños ven na figura da raíña algo desfasado e elitista. Coma sempre, diversidade de opinións.
No Concello non dan explicacións, pero remiten a un posible comunicado nas próximas horas ou días da Fundación Globo de Betanzos. Agora toca esperar e mirar ao ceo para saber se o globo de Betanzos voará nas próximas festas de San Roque.
