Polémica en Vilasantar polas obras de restauración do santuario da Nosa Señora da Laxe
O santuario da Nosa Señora da Laxe está situado na parroquia de San Martiño de Armental en Vilasantar. Data do século XVI e foi un importante centro de peregrinación. Pero co paso do tempo a humidade foi deteriorándoo.
A Consellería de Cultura adxudicou no mes de maio un proxecto de restauración cun orzamento de máis de 256 mil euros que comprende a mellora da inpermeabilización, o campanario e outras actuacións. Pero o avance das obras caeu como xarra de auga fría para os fregueses, cando viron que recebaban as fachadas laterais, ocultando a pedra en vez de encintala. Séntense enganados e decepcionados.
Non entenden o cambio de criterio dos técnicos porque na rehabilitación do albergue anexo e mesmo na dunha vivenda enfronte esixiron que se respectase a pedra e o encintado.
Aseguran que ata o párroco, que ten 94 anos está moi desgustado.
Desde a Consellería de Cultura argumentan que a intervención se axusta ao proxecto de execución e que obedece a criterios do persoal técnico da Dirección Xeral de Patrimonio. Pero os fregueses téñeno claro, preferirían que deixaran a igrexa como estaba antes de facer o que están facendo.
