Piden unha solución para un edificio case abandonado na Coruña

Os veciños do portal 120 da Ronda de Nelle, na Coruña, quéixanse dos problemas de convivencia que teñen que sufrir a diario. O edificio non ten auga e encóntrase en estado de deterioración.

Ao parecer, o dono faleceu, dous fillos tiveron problemas coa herdanza e o edificio está abandonado. Non teñen nin auga. Houbo un problema coa acometida e os propios inquilinos puxéronse a arranxala, o cal veu a dar nunha desfeita. A compañía cortou a subministración.

Algúns dos que viven neste edificio din que pagaban o alugueiro, que era duns 400 euros ao mes, con todas as subministracións incluídas. Pero afirman que hai tempo que ninguén lles vén a pedir contas.

Mesmo hai algúns que din que pagaron tres mil euros pola vivenda enteira, malia que non teñen papeis que testemuñen a transacción. Os problemas de convivencia comezaron en 2013, cando viñeron a vivir nun piso ata 34 persoas, que eran vítimas dunha mafia que explotaba a mendigos.

Antonio Caride, Presidente da Asociación de veciños da praza do Comercio, explica que no seu día houbo denuncias de venda de droga, de liortas e de violencia machista. Que vivir aquí é insoportable porque ao non ter auga as defecacións tíranas polas fiestras e acaban nos patios. 

"Aquí ten que haber como unha especie de mafia que vai alugando as vivendas duns para outros, é imposible identificalos. Queremos convivir en tranquilidade, é unha zona tranquila e despois de varios anos con este problema ninguén nos fai caso".