Pedrafita volveu asumir o tráfico da autovía A-6 polas obras de modernización do túnel
A circulación cara ao Bierzo e o centro da Península desviouse polo centro da vila
A estrada N-VI volveu albergar máis tráfico do habitual ao seu paso por Pedrafita do Cebreiro.
O motivo é a mellora do túnel que discorre por debaixo da vila, o que supuxo o desvío dos vehículos que circulan en sentido descendente. É dicir, os que se dirixen cara á Meseta, entre os que abundan os camións de transporte de mercadorías.
A outra cara da moeda encóntrase nos negocios da vila, con máis actividade do normal mentres se executan os traballos no túnel de Pedrafita.
Para hostaleiros e comerciantes, supón unha breve volta aos tempos en que todo o mundo tiña que pasar por diante dos seus negocios.
Ademais do túnel de Pedrafita, os do Cereixal, Doncos ou San Pedro, entre os concellos de Becerreá e As Nogais, tamén están a ser modernizados polo Ministerio de Transportes.
