Eustaquio continúa pastoreando ovellas aos seus 104 anos
Eustaquio Pérez, hoxe de aniversario, érguese ás cinco da mañá para levar as ovellas ao monte
Non toma medicación e móvese con axilidade entre toxos e fentos
É veciño de Quintela de Leirado, comarca de Celanova, a terra dos centenarios
"Se naciches no 21 e estamos no 2024, cantos son? 104, penso eu", respóndelle Eustaquio ao seu neto Pablo. Pensa ben. Cento catro anos son os que fai e celebrouno, ata agora, coma calquera outro día.
"Sabes o que ando facendo? arranxando o rego, que mo estragan os xabarís", lamenta.
O oído é o único que lle falla. Non precisa medicación e érguese antes ca o sol.
"Ás cinco como máximo, catro, catro e media... ou ás veces, coma hoxe, ás seis. Pero tamén me deito segundo o corpo me pide. Eu ao corpo doulle aquilo que precisa, máis nada", di, sabiamente.
Coma o 70 por cento da poboación de Quintela de Leirado, Eustaquio estivo emigrado en Guinea, cando era colonia española. "E aprendín a linguaxe de alí, o pichinglis", asegura.
O seu neto foi quen nos axudou a dar con el no monte. Eustaquio e a súa muller viven sós, pero reciben visitas frecuentes de fillos, netos e bisnetos.
Pablo Pérez, neto de Eustaquio: "Un marcha de onda el e a miña avoa con moita paz mental, porque leva unha vida moi tranquila e humilde"..
E así ten pensado seguir, para celebrar de novo o ano que vén.
"Son feliz e vivo felizmente, á miña maneira. A ver se conto o ano que entra con saúde", conclúe Eustaquio.
