Papa Gaye, cun dobrete, lidera un imparable Pontevedra (2-3)
O equipo de Rubén Domínguez consolídase no terceiro posto despois de sumar a quinta xornada sen perder no campo do Estremadura
O Pontevedra continúa en estado de graza. Gañou no campo do Estremadura (1-3) cun Papa Gaye en plan estelar, con dous goles e xerando moito perigo ao longo de todo o partido. Con este resultado o equipo de Rubén Domínguez consolídase no terceiro posto e suma 13 dos últimos 15 puntos en xogo.
O extremo senegalés foi o primeiro en acertar aos doce minutos do primeiro tempo. O Estremadura, recén ascendido con aspiracións a estar nos postos altos, igualou cun tanto do seu máximo realizador, Rodri Escudero. Pero antes do descanso Gaye aproveitaba un centro medido de Rui Pedro para devolver a vantaxe ao conxunto granate.
No segundo tempo presionou o equipo de Almendralejo e o Pontevedra buscou as contras para sentenciar o marcador. Fallaron os locais e non perdoou o equipo galego cun remate de Domingo Mba logo dun novo centro de Rui Pedro. O partido parecía decidido pero o Estremadura deu un último arreón cun gol de Iker Burgos no primeiro minuto do engadido. Foi tempo de sufrimento para o Pontevedra ata o 96 pero acabou certificando unha nova vitoria.
