Os xogos de mesa de Crecer Creando conquistan unha cafetería da Coruña
Son xogos educativos e matemáticos moi entretidos e para todas as idades
Na Coruña a tarde do sábado non estaba para moito paseo, así que optamos por entrar nunha cafetería da Gaiteira, que hoxe estreaba quedada de xogos de mesa. A clientela cafeteira de todas as tardes notou decontado máis balbordo do habitual. "Ao mellor parece un pouco raro ver xente colocando un taboleiro grande sobre a mesa dunha cafetería, non?", preguntábase un dos nenos que se achegou a xogar.
A responsable desta rareza tan interesante é Ana Rodríguez Alba, que imaxinou e creou todos os xogos de mesa que animaron a tarde na cafetería Tamago, situada na Gaiteira.
" Penso que non hai mellor forma de coñecer xente que xogar a un xogo de mesa tomando un bo café", explica.
"Sento que a xente pensa en nenos cando falamos de xogo, pero son para todos, todos temos que xogar e divertirnos", di unha das xogadoras adultas.
Son xogos moi divertidos pensados para mentes curiosas e creativas de calquera idade. Todos exercitan capacidades como a lóxica, a memoria, a atención, a estratexia ou o cálculo. O tempo desapracible prestábase para esta quedada, agardan que a primeira de moitas máis de aprendizaxe e xogos compartidos.
