Os xinetes das ondas compiten na Costa da Morte no Malpica Surf Fest

Ondas e táboas fan de Malpica o centro do surf nacional por un día. É que durante todo o día a praia de Area Maior acolle o Malpica Surf Fest, un evento que achega os representantes máis salientables do circuíto nacional e que tamén conta co ambiente máis atractivo para os seguidores desta afección.

"É a primeira edición do Malpica Surf Fest por esa cuestión de que imos meter máis actividades para facer unha fin de semana máis amena en Malpica e que a xente poida vir desfrutar dos mellores surfistas nacionais e termos un día agradable na praia arredor do surf", comenta Carlos Fernández, organizador do evento.

A competición, que conta coas probas finais para este serán, acolle corenta participantes de dúas especialidades: a de longboard, na que se desenvolve unha das probas da liga nacional, e a Stand Up Paddle, da que sairá o campión de España.

"Fago 'longboard', que é cunha táboa máis longa, onde no canto de xirar danse pasos para chegar á punta. Tamén os xiros son máis suaves", comenta Lola, unha surfista coruñesa, sobre a especialidade na que participa.

O festival, que ademais de competición tamén inclúe feira e actuacións musicais, está organizado por One Surf Academy. Aínda que a vila coruñesa xa acollera competicións previas, o Malpica Surf Fest pretende converterse nunha cita ineludible para desfrutar do deporte e das excelencias da Costa da Morte.