Os veciños dunha parroquia de Melide, doídos polo estrago do seu cruceiro
Atopárono tirado a comezos desta semana e cren que foi un acto intencionado
No Museo de Melide consideran que ten un gran valor inmaterial pola vinculación coa fonte
Os veciños aseguran que a auga da fonte do cruceiro arreda os vermes das hortas
Para os veciños da parroquia dos Ánxeles, de Melide, a fonte da Nosa Señora é un lugar moi especial. Por iso estes días están especialmente indignados e apenados por velo tirado, tal como din que o atoparon o luns desta semana. Dóelles especialmente pensar que puidese ser un acto intencionado.
O dano é especialmente sentido polo vínculo devocional que hai con esta fonte. Desde o Museo Terra de Melide, consideran que é precisamente isto o que lle dá un especial valor especial a este cruceiro como patrimonio inmaterial.
Cristina Vázquez Neira, arqueóloga do Museo, explica que esta peza, que pola súa tipoloxía podería ser do século XIX, se fixo sobre o manancial para santificar o lugar, por iso ten tanta significación para os veciños, que lle atribúen, entre outras cousas, o poder de arredar os vermes das hortas.
Os veciños téñenlle devoción á auga da fonte do cruceiro de Nosa Señora
Tanto na parroquia coma no museo agardan que a investigación aberta dea axiña cos causantes do estrago, pero, á marxe diso, a súa prioridade é que se restaure o cruceiro e todos están dispostos a contribuír.
