Veciños de Trabanca Badiña, en Vilagarcía, denuncian inseguridade no seu barrio

O problema vén de atrás, pero foi a máis nos últimos meses. Os veciños de Trabanca Badiña aseguran que en dúas vivendas do barrio se vende droga e que esta ruína serve de narcosala as 24 horas do día.

"Ademais ameazan se lles dis algo e teñen pelexas, nós queremos tranquilidade, non os queremos aquí". "Aquí arriba venden droga para toda a xente que ven de Vilagarcía, veñen de moitos sitios en coches", explican os veciños afectados.

O ir e vir de traficantes e toxicómanos provoca, din, ruídos, liortas e mesmo roubos e ameazas á veciñanza que os sinala.

"Forzaron o mesmo coche dúas veces, tamén unha furgoneta e unha veciña que os increpou recibiu ameazas", di Minerva Barcala, a vogal da Asociación de Veciños de Trabanca Badiña. "Eu recibín insultos e ameazas, xa o denunciei na policía e nos xulgados".

Preto do centro de día, na marquesiña do bus, no parque infantil... aseguran que ultimamente é habitual velos consumir mesmo diante dos nenos e a plena luz do día.

"Hai trasfega de toxicómanos e trapichean diante dos nenos, non queremos que se normalice esta situación", engade Minerva.

Malia que a policía atende as súas chamadas, o problema non cesa.

"A policía vén se os chamas, pero non disuade, porque eles desaparecen no momento e despois volven".

Sospeitan que a compravenda de drogas se desprazou desde o centro da Vilagarcía ao seu barrio e piden solucións urxentes para recuperar a tranquilidade.