Os usuarios das termas solicitan unha ampliación dos horarios

Acceso durante só unha hora entre as dez e a unha do mediodía e entre as catro e as sete da tarde. Son os novos horarios das termas de Outariz e A Burga de Canedo tras a súa reapertura. A auga renóvase cada catro horas, por iso as termas pechan tamén ao mediodía. Hai ademais limitacións de ocupación e vixilantes que controlan o cumprimento das normas. 

"Estou encantada de que haxa un aforo e teñamos que rexirnos por unhas normas, para min é unha marabilla". "Pois un cambio bo, porque antes da pandemia había moita aglomeración, mal controlado...vexo ben o tempo, vexo ben todo". "Controlan a ocupación, toda a xente que entra, ben, moi ben", comenta a xente.

As termas pecharon dous anos pola pandemia, de feito as únicas que están abertas polo de agora son, ademais das privadas, esta de Outariz e a da Burga de Canedo. As limitacións que viñeron coa súa reapertura, especialmente os horarios restrinxidos, non acaban de convencer moitos usuarios. 

"Foron modificando, de media hora a unha hora, pero tes que entrar a unha hora determinada ou senón botar menos tempo, entón é un pouco complicar a cousa sen ter moito porqué". "Pecha a mediodía, pecha moi cedo pola noite, abre tarde pola mañá, non todas as pozas están abertas...", explican os usuarios.

A Asociación de Amigos das Termas, que conta con case dous mil socios, solicitou xa unha xuntanza co Concello.

"Non entendemos moi ben o porqué do horario comercial que lle puxeron, queremos que alguén nolo explique. Como mínimo queremos os mesmos dereitos que ten aquel edificio que está alí a trescentos metros que son as termas privadas. É dicir, que non se nos limite a unha hora, queremos como mínimo dúas horas dentro do recinto e por suposto que se amplíe o horario de peche", explicou Enrique Camoeiras, da Asociación Amigos das Termas.

As termas da Chavasqueira e as do Muíño da Veiga, así como a piscina termal das Burgas, seguen polo de agora pechadas. A súa reapertura é outra das reclamacións dos usuarios.