Os trens Avril arrasan en Galicia: máis de 13.000 billetes vendidos en menos de 24 horas

Tras varios atrasos na súa comercialización, os billetes para os trens Avril saíron este xoves á venda e en Galicia a súa comercialización foi masiva.

Tal e como difundiu o ministro de Transportes, Óscar Puente, ás 19:00 horas vendéranse 13.461 billetes en Galicia e 9.246 en Asturias.

En total, 22.707 billetes vendidos para o novo servizo que se prevé que entre en funcionamento o próximo 21 de maio.

Horas antes, Puente facíase eco das cifras e subliñaba o "impresionante" da acollida por parte dos viaxeiros. "Hai usuarios que adquiriron máis de 50", chiaba.

Esta mesma mañá o delegado do Goberno en Galicia, Pedro Blanco, mostraba a súa "satisfacción" polo inicio da venda de billetes de trens Avril, que permitirán a chegada do AVE a cidades como Vigo, A Coruña ou Santiago, pero criticou que a Xunta non o celebre.

Blanco reivindicou que estes convois permitirán máis que duplicar as prazas dispoñibles para viaxar entre Madrid e a Comunidade, pasando a uns 2 millóns ao ano, en comparación coas 800.000 actuais.

"Chama a atención que a primeira reacción por parte da nova conselleira sexa criticalos", lamentou Blanco, en relación ás palabras da titular de Vivenda e Planificación de Infraestruturas.

María Martínez Allegue lamentou que a redución dos tempos é escasa, a pesar da chegada dos Avril.

Este mesmo xoves o presidente da Xunta, Alfonso Rueda, admitiu que os avances eran "boa noticia", pero queixouse de falta de información, e esixiu que se cumpran os compromisos de "máis frecuencias e máis prazas" para a comunidade.

"Estaban a pedilos, estaban a esixilos, estaban a criticar porque non chegaban e agora, cando chegan, a crítica é que reducimos pouco o tempo de desprazamento Madrid-Galicia, cando, como dixemos, isto vaise ir axustando aos poucos e reducindo moito máis tempo", reivindicou, pola súa banda, o delegado do Goberno.

Por iso, Blanco reivindicou que é un día de "celebración", pedindo que se deixe a "confrontación".